માધુરીબેન ગોસ્વામી વ્યાસાસન પર બિરાજમાન, વાંકાનેરની ભાટીયા સોસાયટીમાં શિવ મહાપુરાણ જ્ઞાનયજ્ઞનો ભવ્ય પ્રારંભ
ગોસ્વામી પરિવાર દ્વારા આયોજિત કથામાં શિવભક્તિનો મહાસાગર ઉછળ્યો
વાંકાનેર શહેરની ભાટીયા સોસાયટીની પવિત્ર ભૂમિ પર ઈષ્ટદેવ શ્રી જડેશ્વર મહાદેવ તથા કુળદેવી મા ભવાનીની અસીમ કૃપાથી અને માતા-પિતાના અંતઃકરણના આશીર્વાદથી સર્વ પિતૃઓના મોક્ષાર્થે આયોજિત શિવ મહાપુરાણ જ્ઞાનયજ્ઞ મહોત્સવ કથાનો ભવ્ય અને ધાર્મિક ભાવસભર પ્રારંભ કરવામાં આવ્યો છે. સંવત ૨૦૮૨, મહાવદ-૧, સોમવાર તા.૦૨/૦૨/૨૦૨૬ના રોજ શ્રી મોઢ બ્રાહ્મણની વાડી, ભાટીયા સોસાયટી, વાંકાનેર ખાતે આ પાવન શિવકથાનો આરંભ થતાં સમગ્ર વિસ્તાર શિવમય બની ગયો હતો.
આ શિવ મહાપુરાણ કથા ગં.સ્વ. જમકુરબેન હરેશગીરી ગોસ્વામીના પરિવાર તરફથી આયોજિત કરવામાં આવી છે. કથામાં પોરબંદરના સુપ્રસિદ્ધ, ખ્યાતનામ અને પરમ આદરણીય શિવ કથાકાર માધુરીબેન ગોસ્વામી વ્યાસાસન પર બિરાજમાન રહી ભાવસભર, હૃદયસ્પર્શી અને તત્ત્વજ્ઞાનસભર શૈલીમાં ભગવાન શિવના મહિમાનું અમૃતપાન કરાવી રહ્યા છે.
શિવ મહાપુરાણ કથાના પ્રથમ દિવસે વહેલી સવારથી જ ભક્તોની ભારે ભીડ જોવા મળી હતી. યજમાન પરિવાર દ્વારા વિધિવત પૂજન-અર્ચન, ગણેશ સ્થાપન અને કલશ સ્થાપન બાદ કથાનો આરંભ કરવામાં આવ્યો હતો. વૈદિક મંત્રોચ્ચાર, શંખનાદ અને ઘંટનાદથી સમગ્ર પંડાલ ભક્તિમય બની ઉઠ્યો હતો.
કથા પૂર્વે વાંકાનેરના સત્સંગ ચોકથી ભાટીયા સોસાયટીની મુખ્ય શેરીઓમાંથી ભવ્ય શોભાયાત્રાનું આયોજન કરવામાં આવ્યું હતું. ઢોલ-નગારાના ગુંજતા નાદ સાથે નીકળેલી આ શોભાયાત્રામાં મોટી સંખ્યામાં મહિલાઓ, યુવાનો અને વડીલો ઉત્સાહપૂર્વક જોડાયા હતા. માથે કલશ ધારણ કરેલ બહેનો, ભગવા ધ્વજ સાથે ચાલતા શિવભક્તો અને “હર હર મહાદેવ”ના જયઘોષથી સમગ્ર વિસ્તાર ગુંજાયો હતો. રસ્તાની બન્ને બાજુ શ્રદ્ધાળુઓ દ્વારા શોભાયાત્રાનું ભવ્ય સ્વાગત કરવામાં આવ્યું હતું.
પોથીયાત્રા પૂર્ણ થયા બાદ વ્યાસાસન પર બિરાજમાન માધુરીબેન ગોસ્વામી દ્વારા શિવ મહાપુરાણના મહાત્મ્યનું વિસ્તૃત વર્ણન કરવામાં આવ્યું. તેમણે કહ્યું કે સનાતન ધર્મના વેદો, ઉપનિષદો અને પુરાણોમાં ભગવાન શિવને પરબ્રહ્મ સ્વરૂપ માનવામાં આવ્યા છે. શિવ નિર્ગુણ, નિરાકાર, નિર્વિકાર અને મોક્ષદાતા છે. તેઓ જીવાત્મા અને પરમાત્માની એકતાનું પ્રતીક છે.
માધુરીબેન ગોસ્વામીએ પોતાની ઓજસ્વી વાણીમાં સમજાવ્યું કે આજના કલિયુગમાં માનવ જીવન અનેક તણાવ, અસંતોષ અને અશાંતિથી ઘેરાયેલું છે. આવા સમયમાં શિવભક્તિ જ માનવને આંતરિક શાંતિ, ધૈર્ય અને સદ્દમાર્ગ તરફ દોરી શકે છે. શિવનું સ્મરણ માત્ર પૂજા સુધી સીમિત નથી, પરંતુ જીવનશૈલીમાં શિવતત્વને ઉતારવું એ સાચી શિવભક્તિ છે.
કથાના પ્રથમ દિવસે ભગવાન શિવના અવતાર, લિંગોત્પત્તિ પ્રસંગ, શિવ-પાર્વતી વિવાહ તથા શિવ મહિમાના અનેક પ્રસંગોનું સુંદર અને રસાળ વર્ણન કરવામાં આવ્યું. માધુરીબેનના ભાવસભર સંવાદો અને ભજનોથી શ્રોતાઓ ભાવવિભોર બની ગયા હતા. ઘણી વખત ભક્તોની આંખોમાં ભાવના આંસુઓ પણ જોવા મળ્યા હતા.
આ શિવ મહાપુરાણ જ્ઞાનયજ્ઞ માત્ર ધાર્મિક કથા નથી, પરંતુ સમાજમાં સંસ્કાર, સદાચાર અને આધ્યાત્મિક ચેતનાનો પ્રસાર કરતો મહોત્સવ છે. ગોસ્વામી પરિવાર દ્વારા આયોજિત આ કથામાં દરરોજ મોટી સંખ્યામાં શ્રદ્ધાળુઓ હાજરી આપી રહ્યા છે. મહિલાઓ, યુવાનો અને વડીલો સહભાગી બની કથાનો લાભ લઈ રહ્યા છે.
યજમાન પરિવારના રવીગીરી ગોસ્વામી અને કલ્પેશગીરી ગોસ્વામી દ્વારા સર્વ ધર્મપ્રેમી જનતાને આ શિવ મહાપુરાણ જ્ઞાનયજ્ઞનો લાભ લેવા જાહેર આમંત્રણ પાઠવવામાં આવ્યું છે. તેમણે જણાવ્યું કે કથા દરમિયાન ભક્તોની સુવિધા માટે વિશાળ પંડાલ, પીવાનું પાણી, સ્વચ્છતા તથા વ્યવસ્થિત બેઠકની સુવિધા ઉપલબ્ધ કરાવવામાં આવી છે.
દરરોજ કથા વિરામ બાદ ભક્તો માટે મહાપ્રસાદની વ્યવસ્થાપણ પણ રાખવામાં આવી છે, જેમાં શ્રદ્ધાપૂર્વક સેવા આપવામાં આવી રહી છે. સેવાભાવી કાર્યકરો અને યુવક મંડળીઓ દ્વારા વ્યવસ્થાઓને સુચારુ રીતે સંચાલિત કરવામાં આવી રહી છે.
શિવ મહાપુરાણ જ્ઞાનયજ્ઞ મહોત્સવના પ્રથમ દિવસથી જ વાંકાનેર અને આસપાસના વિસ્તારોમાં આધ્યાત્મિક ઉલ્લાસ અને ભક્તિભાવનું વાતાવરણ સર્જાયું છે. ભક્તોમાં ભારે ઉત્સાહ જોવા મળી રહ્યો છે અને આગામી દિવસોમાં પણ મોટી સંખ્યામાં શ્રદ્ધાળુઓ કથાનો લાભ લેશે તેવી અપેક્ષા વ્યક્ત કરવામાં આવી રહી છે.
આ રીતે, ભાટીયા સોસાયટીમાં આયોજિત શિવ મહાપુરાણ કથા ન માત્ર ધાર્મિક કાર્યક્રમ તરીકે, પરંતુ સમાજને શિવતત્વ તરફ દોરી જતો એક મહાન આધ્યાત્મિક યજ્ઞ બની રહ્યો છે.
રિપોર્ટર : વિરમભાઈ કે. આગઠ
