જનજાતિ સમાજના પ્રેરણાસ્ત્રોત અને વિદ્રોહી ક્રાંતિકારી ભગવાન બિરસા મુંડાની 150મી જન્મજયંતિને નિમિત્તે અખિલ ભારતીય વિદ્યાર્થી પરિષદ (ABVP) દ્વારા દેશવ્યાપી જનજાતિ ગૌરવ કળશ યાત્રાનું આયોજન કરવામાં આવ્યું છે. આ યાત્રા રવિવારે વલસાડ જિલ્લાના ધરમપુર શહેરમાં આગમન થતાં જ સમગ્ર વિસ્તારમાં ઉત્સાહ, ગૌરવ અને સંસ્કૃતિક ઉમંગનો માહોલ સર્જાયો હતો.
ધરમપુરની પ્રતિષ્ઠિત એસ.એમ.એસ.એમ. હાઇસ્કૂલ ખાતે વિદ્યાર્થીઓ, શિક્ષકો, નગરજનો અને ABVPના કાર્યકરો દ્વારા કળશ યાત્રાનું ઉષ્માભર્યું સ્વાગત કરવામાં આવ્યું. યાત્રામાં સાથે લાવવામાં આવેલા બિરસા મુંડાના વતન ઉલીહાટની પવિત્ર માટીથી ભરેલા કળશને વિશેષ સન્માન સાથે મંચ પર સ્થાપિત કરવામાં આવ્યો. સમગ્ર કાર્યક્રમ દરમિયાન ‘ધરતી આબાના’ જાજ્જ્વલ્યમાન સંઘર્ષ અને બલિદાનની યાદ પ્રગટાઈ.
આ કળશ યાત્રાનો મુખ્ય હેતુ આદિજાતિ સમાજના ઇતિહાસ, સંસ્કૃતિ અને રાષ્ટ્રીય ચેતનામાં બિરસા મુંડાના આગવા યોગદાનને સામાન્ય લોકો સુધી પહોંચાડવાનો છે. ખાસ કરીને યુવા પેઢી સુધી દેશના આ મહાન ક્રાંતિકારીના વિચારો અને મૂલ્યો પહોંચે તે માટે યાત્રાનો વિશાળ સ્તરે સ્વાગત અને કાર્યક્રમો યોજાઈ રહ્યા છે. ધરમપુરમાં યાત્રાના આગમન સાથે જ મોટી સંખ્યામાં સ્થાનિક નાગરિકો, વિદ્યાર્થીઓ, મહિલાઓ અને સામાજિક સંસ્થાઓ જોડાયાં હતાં.
સમાપન કાર્યક્રમ પ્રસંગે રાજ્યના આદિજાતિ વિકાસ મંત્રી નરેશભાઈ પટેલ વિશેષ ઉપસ્થિત રહ્યા હતા. પોતાના સંબોધનમાં તેમણે જણાવ્યું કે “બિરસા મુંડા માત્ર એક ઐતિહાસિક પાત્ર નહીં પરંતુ આદિજાતિ સમાજના આત્મગૌરવ અને સશક્તિકરણના પ્રતીક છે. તેમની પરંપરા, સંસ્કૃતિ અને ક્રાંતિકારી વિચારસરણીને જીવંત રાખવા માટે રાજ્ય સરકાર સતત પ્રયત્નશીલ છે.” તેમણે આદિવાસી યુવાનોને પરંપરા–વારસાને જાળવી રાખી શિક્ષણ, રમતગમત અને સામાજિક ક્ષેત્રોમાં આગળ વધવા પ્રોત્સાહિત કર્યા.
આ પ્રસંગે ધરમપુરના MLA અરવિંદભાઈ પટેલ, ભાજપના મહેન્દ્રભાઈ ચૌધરી, સામાજિક કાર્યકર્તા ડો. હેમંતભાઈ પટેલ, ABVPના હર્ષભાઈ આહીર, મનનભાઈ પટેલ, ડૉ. હેમલતાબેન, તેમજ વલસાડ જિલ્લાના વિવિધ વિસ્તારોમાંથી આવેલા ABVP કાર્યકર્તાઓ ઉપસ્થિત રહ્યા હતા. સમગ્ર કાર્યક્રમ દરમિયાન યુવાનોમાં દેશભક્તિ, પરંપરા પ્રત્યેનો ગૌરવ અને સામાજિક સંકલ્પનો જુસ્સો જોવા મળ્યો.
સમાપન સાથે કળશ યાત્રાએ ધરમપુર સહિત પ્રદેશમાં આદિજાતિ ગૌરવ, સંસ્કૃતિ સંરક્ષણ, અને ઇતિહાસ પ્રત્યેની જાગૃતિના સંદેશને વધુ પ્રબળ બનાવ્યો. યાત્રાની પ્રેરણાત્મક અસરથી વિદ્યાર્થીઓ અને નગરજનોમાં બિરસા મુંડાના જીવન સંદેશને અનુસરી સમાજના સર્વાંગી વિકાસ માટે કાર્ય કરવાની ભાવના દ્રઢ થઈ હતી.