સેવા, દાન અને સમાજકાર્યના આદર્શને જીવંત બનાવતા વલસાડના પાંડે પરિવાર દ્વારા સ્વર્ગસ્થ મીનાબેન કૈલાસનાથ પાંડેજીની પાવન સ્મૃતિમાં એક વિશાળ સેવા યજ્ઞનું આયોજન કરવામાં આવ્યું. આ સેવા યજ્ઞ અંતર્ગત વલસાડ સરકારી હોસ્પિટલમાં સારવાર લઈ રહેલા ગરીબ દર્દીઓને અંદાજે 16 લાખ રૂપિયાની દવાઓનું નિ:શુલ્ક વિતરણ કરવામાં આવ્યું. આ અનોખા કાર્યક્રમની અધ્યક્ષતા વલસાડના લોકસભા દંડક અને સાંસદ શ્રી ધવલભાઈ પટેલે કરી હતી.
કાર્યક્રમમાં અનેક આગેવાનો અને સમાજજીવો ઉપસ્થિત રહ્યા હતા. જેમાં ધારાસભ્ય શ્રી ભરતભાઈ પટેલ, ધારાસભ્ય શ્રી અરવિંદભાઈ પટેલ, જિલ્લા પંચાયત પ્રમુખ મનહરભાઈ પટેલ, ભાજપ જિલ્લા પ્રમુખ હેમંતભાઈ કંસારા, મહામંત્રી કમલેશભાઈ પટેલ, સાંઢપોર-પારડીના સરપંચ ભોલાભાઈ પટેલ, મીડિયા કન્વીનર હિતેષભાઈ સુરતી, તથા જાણીતા કથાકાર પ્રફુલભાઈ શુક્લ સહિત અનેક અગ્રણીઓ હાજર રહ્યા હતા.
સ્વાગત પ્રવચન દિવ્યેશભાઈ પાંડેે આપ્યું હતું. પ્રસંગે કથાકાર પ્રફુલભાઈ શુક્લે પાંડે પરિવારની ત્રણ પેઢીઓની સેવા પરંપરાને યાદ કરી અને સ્વર્ગસ્થ અમરનાથ પાંડેજી તથા કૈલાશનાથ પાંડેજીના સેવાકાર્યોને સ્મરણ કરતાં કહ્યું કે, “દુનિયાના બધા જ યજ્ઞોમાં સેવા યજ્ઞ શ્રેષ્ઠ છે. સાચો યજ્ઞ એ છે જેમાં સમાજના ગરીબ-અસહાય લોકોની જરૂરિયાતોને પહોંચી વળવામાં આવે.”
ત્યારે ઉપસ્થિત આગેવાનોમાં સાંસદ ધવલભાઈ પટેલ, ધારાસભ્ય ભરતભાઈ પટેલ, અરવિંદભાઈ પટેલ તથા જિલ્લા પ્રમુખ હેમંતભાઈ કંસારાએ પણ પ્રસંગિક ઉદબોધન કરી પાંડે પરિવારના આ કાર્યની પ્રશંસા કરી હતી. એમણે જણાવ્યું કે, આ પ્રકારની સેવા માત્ર વ્યક્તિ નહીં પરંતુ સમગ્ર સમાજને પ્રેરણા આપે છે.
કાર્યક્રમમાં હાજર લોકોએ પણ એકમતથી અભિપ્રાય વ્યક્ત કર્યો કે, “ગરીબ દર્દીઓ માટે દવાઓનું વિતરણ કરવાનો આ સેવા યજ્ઞ ખરેખર પ્રેરણાદાયી છે.” પાંડે પરિવારના પાંચ પુત્રો તથા પુત્રવધુઓએ એકજૂટ થઈ આ સેવા કાર્યોને આગળ ધપાવ્યા છે. સમાજમાં આજે પણ આદર્શરૂપે નિ:સ્વાર્થ સેવા કરનાર પરિવારો છે એ વાત સૌ કોઈને ગૌરવ આપે છે.
લોકપ્રતિભાવ મુજબ, પાંડે પરિવારના આ પ્રયાસને કારણે અનેક ગરીબ દર્દીઓને નવી આશા મળી છે. આરોગ્ય જેવી મૂળભૂત જરૂરિયાત પૂરી કરવામાં આ સેવા યજ્ઞે મહત્વપૂર્ણ ભૂમિકા ભજવી છે. વલસાડમાં યોજાયેલ આ સેવા કાર્યક્રમ સૌ માટે એક ઉદાહરણરૂપ છે કે, જો સમાજના સક્ષમ લોકો આગળ આવી સેવા કરશે તો ગરીબોને મોટો આધાર મળી શકે છે.
આ પ્રસંગે દવાઓના વિતરણ દરમિયાન દર્દીઓના ચહેરા પર ખુશીના ઝળહળતા ચહેરા જોવા મળ્યા. કાર્યક્રમ પૂર્ણ થયા બાદ સૌએ પાંડે પરિવારને હૃદયપૂર્વક અભિનંદન પાઠવ્યા હતા.
આ રીતે પાંડે પરિવારના આ સેવા યજ્ઞે વલસાડમાં માનવતાની સાચી ભાવના જીવંત કરી દીધી છે.
